Mikið djöfulli, viðbjóðslega, ógeðslega er þessi nýi listaháskóli á Laugavegi skelfilega, andskoti ljótur og stingur í stúf við götumyndina. Verður ekki Ólafur F. að gera eitthvað í þessu? Svona fer þegar arkítektum er hleypt í að teikna hús. Þetta skrýmsli gæti sómt sér við hliðina á kjarnorkuveri og olíuhreinsunarstöð í iðnaðarhverfi í útjaðri stórborgar í Bandaríkjunum en í hjarta smábæjar eins og Reykjavíkur, við hliðina á litlum bárujárnsklæddum timburhjöllum, er þetta eins og stórvaxið graftarkýli í miðju smettinu á höfuðborginni.
Ég var á Skriðuklaustri á Héraði um daginn og þar héngu uppi teikningar úr samkeppni um gestastofu við safnið. Þar hafði dómnefndin haft þá skynsemi að segja í umsögn um allar tillögurnar að þær væru ljótar, með mismunandi orðalagi þó. Meira að segja sigurtillagan fékk þá umsögn að hún væri dimm, þröng og í ósamræmi við staðinn.
Af hverju í ósköpunum er ekki hægt að teikna hús þannig að þau passi við það sem fyrir er í umhverfinu. Ég held að öllum nema arkítektum gæti tekist það.
Eins og sést er ég haldinn fordómum gagnvart arkítektum og tel einsýnt að ef það þarf að fá einhverja til að teikna hús þá eigi að setja verkfræðinga í það en ekki arkítekta.
Ég hef tekið eftir því að þeir sem halda á lofti fáránlegum og heimskulegum skoðunum passa sig á því að leyfa ekki athugasemdir við þær svo að þær séu ekki skotnar í kaf samstundis.
Mig grunar að Indverjinn sem hefur ekki enn náð að klára 10. árs prófin í grunnskóla þrátt fyrir að hafa reynt 38 sinnum og vera orðinn 74 ára sé samkynhneigður. Hann hét því að kvænast ekki fyrr en hann útskrifaðist og virðist hafa gert sitt ítrasta til að fresta því. Af tvennu illu er líklega betra að vera talinn heimsins versti námsmaðuren hýr á Indlandi .
Krossgátuhöfundur Fréttablaðsins veldur mér vonbrigðum. Svo er mál með vexti að hann virðist ekki hafa notkun orðanna út og utan á valdi sínu en notar óspart í krossgátum sínum. Hann virðist telja þessi tvö orð samheiti og bæði hafa þá merkingu að fara til útlanda. Þetta er stór misskilningur sem mér finnst ég líka hafa rekist á annars staðar. Hið rétta er að þetta eru andheiti, utan er þannig samheiti við inn og út samheiti við innan. Að koma að utan þýðir þannig að hafa verið úti en vera að fara inn og ef þú tekur e-ð innan úr e-u þá ertu að taka það út.
Landnámsmenn fóru út til Íslands, þ.e.a.s. út frá Evrópu. Maður fer því utan þegar maður fer til útlanda en fari maður út er maður væntanlega staddur, t.d., á flugvellinum á Torremolinos og er á leiðinni heim. Þetta er orðnotkun sem á sér margra alda sögu í íslensku og væri leiðinlegt að tapa niður.
Nú er að verða breyting á afstöðu Sjálfstæðisflokksins til Evrunnar og athyglisvert að það er Björn Bjarnason sem er látinn athuga viðbrögð almennings við þessari nýju stefnu en hann hefur jú verið helsti Evrópuandstæðingur Flokksins um árabil.
Hingað til hefur stefna Sjálfstæðisflokksins verið sú að Evrópusambandsaðild komi ekki til greina, það sé mun skynsamlegra að taka upp bandarískan dollar eða norræna krónu eða svissneska franka eða simbabveskan dollar eða bara hvað sem er annað en Evru þrátt fyrir að hagfræðingar hafi reiknað kostnaðinn við að halda úti íslensku krónunni á hálfa milljón á hvert heimili á Íslandi á ári.
Og hver er svo þessi nýja stefna? Jú, það er gamla stefna Framsóknarflokksins sem engin þar innanbúðar styður lengur nema Valgerður Sverrisdóttir sem fyrst vakti máls á henni þegar hún var iðnaðar- eða utanríkisráðherra og uppskar ekki annað en háðsglósur samstarfsflokksins í ríkisstjórn þá (sem og fordæmingu Guðnaarmsins), þ.e. að taka upp Evru án þess að ganga í Evrópusambandið. Reyndar vill Björn samninga við ESB um að hægt væri að taka upp Evruna á grundvelli EES-samningsins. Það er örugglega betra en að halda í krónuna en ég efast umm að það sé hægt. Yfirlýsing um að Ísland ætli að sækja um aðild að ESB er það sem þarf núna. Við megum heldur ekki gleyma því að hingað til hafa Sjálfstæðismenn ásakað alla sem minnast á Evru um að tala krónuna niður og stuðla þannig að núverandi efnahagsvanda, hann komi s.s. óábyrgum fjármálafyrirtækjum, hruni á alþjóðamörkuðum, fasteignafylleríi, Kárahnjúkavandanum, ofþenslu og offjárfestingu ekkert við heldur sé bara afleiðing galgopalegrar orðræðu samræðustjórnmálamanna.
En fyrst Björn er farinn að tala um Evruna þá hlýtur það að vera orðið í lagi.
Í dag er síðasti dagurinn fyrir fjölmarga BHM-félaga að greiða atkvæði um kjarasamning BHM við ríkið. Kennarafélög HÍ og KHÍ (kennarafélagið er enn til þó skólinn sé það ekki) greiða atkvæði í næstu viku.
Það er úr vöndu að ráða. Samningurinn felur í sér launahækkun um 20.300 + 2,2%. Það nægir ekki til að koma í veg fyrir kaupmáttarskerðingu miðað við núverandi verðbólguspár. Mér er líka sagt að raunverðmæti launa BHM hafi skerst s.l. þrjú ár. Þetta verði því fjórða árið af kjaraskerðingu. Það er vissulega erfitt að skrifa undir slíkt. Vegna þess að hækkunin er nánast öll í krónutölu en ekki prósentu þá hækka allir nánast jafnt og hlutfallslegur munur milli hæstu og lægstu launa minnkar. Þetta þýðir í raun að dregið er úr mikilvægi menntunar í launamyndun sem er undarlegt hjá stéttarfélagi háskólamanna. Sjálfur er ég raunar hlynntari krónutöluhækkunum en prósentum, það gerir e.t.v. jafnaðarmaðurinn í mér, þó ég telji að meta þurfi menntun að verðleikum þá held ég að 2,2% í einu sé nóg til þess. Það verður líka að líta til þess að ef alltaf eru einungis prósentuhækkanir eykst bilið í krónutölu milli hæstu og lægstu launa óásættanlega mikið.
Það sem mælir hins vegar með því að samþykkja þessa samninga er að þetta er sambærilegt við það sem aðrar stéttir hafa verið að fá og erfitt að sjá afhverju BHM ætti að fá meira (háskólamenn hjá ríkinu hafa reyndar dregist aftur úr háskólamönnum á almennum markaði í launum, og þá er ég að tala um sömu starfsheiti). Samninganefnd BHM telur að án aðgerða verði varla hægt að ná meiru í þetta skipti og hvað myndi það þýða að fara í aðgerðir? Það myndi þýða a.m.k. 2-3 mánuði til viðbótar án samnings, hugsanlega verkfall og samning eftir það sem nánast örugglega myndi ekki dekka kostnaðinn af þessum samningslausu mánuðum eða mismuninn á verkfallsbótum og launum ef til verkfalls kæmi.
Ég er búinn að greiða atkvæði en ætla ekki að gefa afstöðu mína upp. Ég hvet alla BHM-félaga til að kjósa. Hvort sem samningurinn er felldur eða samþykktur skiptir miklu máli að meirihluti félagsmanna standi á bakvið þá ákvörðun.
Það fór allt í hávaðaloft vegna þess að Vodafone notaði íslenska fánann í auglýsingu. Reyndar er hann líka í kaffiauglýsingunum með Kristni R. Ólafssyni þó enginn hafi kvartað undan því. Munurinn felst líklega í því að Merrild notar fánann á smekklegan hátt en Vodofone ekki (að mínu mati), en er hægt að banna mönnum að vera ósmekklegir? Það varð líka hávaði í samfélaginu vegna þess að gert var grín að þjóðsöngnum á einhverri samkomu hjá ungum framsóknarmönnum (sem er reyndar oxymoron). Spaugstofan gerði slíkt hið sama fyrir stuttu og skapaði ekki mikið umtal. Nú veit ég ekki hvernig þetta var gert hjá SUF svo ég veit ekki hvort þeir voru ósmekklegri en Spaugstofan. Hins vegar er textinn við þjóðsönginn þvílíkt hrat og leirburður að hann gerir eiginlega grín af sér sjálfur.
Sjálfum finnst mér siðleysi alvarlegra en smekkleysi. Siðleysi sem felst meðal annars í því að vísa hælisleytendum úr landi án þess að skoða mál þeirra, tryggja sjálfum sér svimandi háa starfsloka-, kaupréttar- og eftirlaunasamninga, stinga af með trúanaðarskjöl, kalla glæpi sína tæknileg mistök, gefa einkavinum sínum kvótann og bankana, o.s.frv. o.s.frv.
Munurinn virðist hins vegar vera sá að smekkleysið er bannað með lögum en siðleysið er bara það; löglegt en siðlaust, eins og einhver sagði (Vilmundur Gylfason). Það er einmitt aðaleinkenni siðleysingjans að skýla sér á bak við lög og reglur. Hann hefur nefnilega ekkert siðferði til að styðjast við og verður því að leita annað.
Á hvers konar ofurlaunum var bæjarstjórinn í Grindavík eiginlega ef starfslokasamningur við hann kostar 45 milljónir? Forstjóri REI og þar áður OR fékk “bara” 30. Annars held ég að það þurfi að skera upp herör gegn starfslokasamningum á Íslandi. Vanalegt launafólk fær greiddan uppsagnarfrest og svo atvinnuleysisbætur ef það missir vinnuna. Ég skil ekki afhverju það sama gildir ekki um forstjóra, framkvæmdarstjóra og bæjarstjóra. Ef bæjarstjórinn í Grindavík var ráðinn eftir síðustu kosningar er hann búinn að starfa í u.þ.b. tvö ár og á þá líklega rétt á þriggja mánaða uppsagnarfresti. Ef hann er búinn að vera bæjarstjóri lengur gætu þeir verið sex. Ég efast um að sex mánaða laun bæjarstjóra geti gert 45 milljónir.
Það er allt að springa í loft upp vegna fyrirhugaðs eldflaugavarnarkerfi Bandaríkjanna í Tékklandi og Póllandi. Rússar æfir vegna þess að þótt kerfinu sé ekki beint gegn þeim benda þeir, réttilega, á að það sé bara tímaspursmál um það hvenær svo verði. Hóta því að sprengja allt draslið í loft upp verði því komið fyrir á annað borð. Bandaríkjamenn harma viðbrögð Rússa og skilja ekki hvers vegna þeir vilja ekki taka þátt í að byggja upp eldflaugavarnarkerfið. Raunar hafa Rússar lagt til að þessu bandaríska eldflaugavarnarkerfi verði slaufað og í staðin byggt upp sameiginlegt eldflaugarvarnarkerfi fyrir Bandaríkin, Rússland og Evrópusambandið. Þessu hafa Evrópusambandið og Bandaríkin hafnað og þá náttúrulega spurning hver það er sem vill ekki leika með.
Á sama tíma berast fregnir um að Íranir séu að prófa eldflaugar sem draga inn í Ísrael. Þetta kemur í kjölfar þess að Ísraelar héldu viðamikla heræfingu með því markmiði að þjálfa heraðgerðir í mikilli fjarlægð (þ.e. í Íran). Það gerðu þeir síðan að undirlagi Bandaríkjamanna sem hafa talað óspart um nauðsyn þess að ráðast inn í Íran. Því miður fá þeir enga aðra en Ísraela með sér í það því það eru allir hættir að taka mark á þeim eftir lygarnar um Írak.
Þó svo að ég hafi megnustu viðurstyggð á stjórnarháttum í Íran, ástandi mannréttindamála, ofsatrú o.s.frv. þá verð ég að segja eins og er að eins og staðan er í dag virðast Ísrael og Bandaríkin vera meiri ógn við heimsfriðinn en Íran.
Eftir að ég byrjaði að vinna hérna í háskólanum sé ég Morgunblaðið mun oftar en áður (illi heilli). Þegar ég flutti frá Ólafsvík til Akureyrar sagði ég upp Mogganum og hef ekki saknað hans nema síður sé. Það sem gerði mig frásnúinn blaðinu á sínum tíma voru endalausar persónulegar árásir á fólk sem ritstjóranum var illa við, bjagaður fréttafluttningur þar sem fjallað var einhliða um mál til að gera hlut sumra betri en annarra og síðast en ekki síst tilburðir blaðsins til að stýra því um hvað væri rætt í samfélaginu og um hvað ætti að ríkja þögnin ein.
Sem betur fer virðist þetta hafa breyst til batnaðar með nýjum ritstjóra, en þó ekki meira en svo að sá nýi er þegar búinn að leggja sumum skoðunum sínum sem stönguðust á við skoðanir fyrri ritstjóra (og e.t.v. eigenda?) um ESB. Það er hins vegar ákveðinn slagsíða á blaðinu núna sem angrar mig næstum því jafnmikið og það er hvernig það er að breytast í ómerkilegan áróðursbækling fyrir ríkiskirkjuna (þjófkyrkjuna). Þetta er reyndar ekki mjög áberandi ennþá en birtist í smáfréttum um að gamli biskupinn keyri enn bíl, sundlaugar blessaðar, kirkjum læst (þær hafa reyndar verið læstar í áratugi að því er ég best veit). Svo eru líka fréttir sem maður skilur enn verr að skuli teljast fréttnæmar, eins og að tveir prestar hafi lent í umferðarslysi og annar þeirra handleggsbrotnað. Nú held ég að margir handlegsbrotni í umferðinni án þess að fá um það jafn mikið pláss í Morgunblaðinu. Hvort þessi nýja árátta Moggans stafar af því að nýi ritstjórinn er prestssonur eða þvi hvað trúarbloggarar eru áberandi á mbl.is og ritstjórnin hafi því séð sóknarfæri með því að höfða sérstaklega til þess hóps þori ég ekki að segja.
Trúarbloggin á mbl.is, skrifin á tru.is og öll þessi umfjöllun í prentmogganum er síðan kannski bara góð þvi hún opnar vonandi augu almennings fyrir nokkrum staðreyndum: Í fyrsta lagi hvað þetta er mikið bull og fáránlegt, í öðru lagi hvað kirkjan er siðlaus og spillt og í þriðja lagi hvað hún kostar almenning (sama í hvaða trúfélagi þeir eru eða eru ekki) mikinn pening (5 milljarða á ári). Eins og vitur maður sagði: Öruggasta leiðin til trúleysis er að lesa biblíuna.
Nú hefur eyjan.is meira að segja farið að leita á þessi mið með nýjum ritstjóra þar, en þar er núna komið trúarlegt blogg. Það er þó mun vandaðra og betur skrifað en mbl.is bloggin enda skrifað af fagmönnum (les. prestum).